पथरी अपडेट। राष्ट्रिय नाचघर मा आयोजना भएको ‘नेशनल स्टुडेन्ट ट्यालेन्ट’ प्रतियोगिताको ग्राण्ड फिनालेमा पथरी शनिश्चरे–१ स्थित एभरेस्ट स्कूलले राष्ट्रिय स्तरमा उल्लेखनीय सफलता हात पारेको छ ।

संघर्ष जन आवाज मिडिया प्रा.लि. द्वारा विद्यार्थीहरूको प्रतिभा उजागर गर्ने उद्देश्यले करिब तीन महिनादेखि राष्ट्रव्यापी रूपमा सञ्चालन गरिएको प्रतियोगितामा देशभरका करिब ५ सय विद्यालयबाट पाँच विधा-गायन, नृत्य, चित्रकला, वक्तृत्वकला र हस्तलेखनमा करिब एक हजार भन्दा बढि विद्यार्थीहरूको सहभागिता रहेको थियो ।

प्रतियोगिताका विभिन्न सात चरण पार गर्दै एभरेस्ट स्कूलका ओसन सेन्चुरी (गायन), स्नेहा वनेम (चित्रकला) र शीतल श्रेष्ठ (हस्तलेखन) फाइनल चरणमा प्रवेश गरेका थिए । फाइनल प्रतिस्पर्धामा उनीहरूले उत्कृष्ट प्रदर्शन गर्दै विद्यालयलाई सफलता दिलाएका छन् ।

गायन विधामा ओसन सेन्चुरी दोस्रो स्थान हासिल गर्न सफल भए भने चित्रकला विधामा स्नेहा वनेमले पनि दोस्रो स्थान प्राप्त गरिन् । हस्तलेखन विधामा शीतल श्रेष्ठ तेस्रो स्थान हासिल गर्न सफल भए ।

प्रतियोगितामा दोस्रो स्थान हासिल गर्ने प्रतियोगीहरूले जनही १/१ लाख रुपैयाँ नगद प्राप्त गरेका छन् भने तेस्रो स्थान हासिल गर्ने प्रतियोगीले ५० हजार रुपैयाँ नगदसहित ट्रफी, प्रमाणपत्र र मेडल प्राप्त गरेका छन् ।