पथरी अपडेट
पथरी। मोरङको पथरीशनिश्चरे–१० स्थित किरात युमा माङहिम परिसरमा राखिएको धार्मिक त्रिशुल र नेपालको राष्ट्रिय झण्डा लडाइएपछि त्यसप्रति आपत्ति जनाउँदै शनिवार पत्रकार सम्मेलनमार्फत कारबाहीको माग गरिएको छ ।

किरात युमा माङहिमका अध्यक्ष सम्शेर राईका अनुसार, शुक्रबार (असार १४) अपरान्ह एक समूहले माङहिम परिसर प्रवेश गरी किरात धर्मसम्बन्धी धार्मिक चिन्हहरू जस्तै त्रिशुल, किरात झण्डा, नेपाल राष्ट्रको झण्डा र राष्ट्रिय विभूति फाल्गुनन्द लिङ्देनको शालिक निर्माणका लागि संकलन गरिएका इँटा लडाइदिएका थिए ।

धार्मिक आस्थामाथिको यस्तो हमलापछि किरात युमा माङहिम समितिले शनिवार पत्रकार सम्मेलन गर्दै घटना दुःखद र निन्दनीय भएको भन्दै दोषी पहिचान गरी तत्काल कानुनी कारबाहीको माग गरेको छ । महागुरु फाल्गुनन्द प्रतिष्ठानका अध्यक्ष सोमप्रसाद पोमुले राष्ट्रिय झण्डा च्यात्ने तथा धार्मिक स्थलमाथि आक्रमण गर्नेहरूमाथि कडा कारबाही गर्न आग्रह गरे ।

घटनास्थलमा प्रदेश सभा सदस्य मानबहादुर लिम्बू र गीता तिम्सिनालगायत जनप्रतिनिधिहरू पुगेर स्थलगत निरीक्षण समेत गरेका छन् । उनीहरूलाई किरात युमा माङहिम समितिले घटनाको जानकारी गराउँदै राज्यको ध्यान आकर्षण गराएको थियो ।
समितिले लडाइएको त्रिशुल र झण्डाहरू फिर्ता गरिनु पर्ने मागसमेत राखेको छ । साथै, घटनापछि धार्मिक समुदायका अनुयायीहरू दिनभर सो क्षेत्रमै तैनाथ रहनु परेको थियो। शनिबार भने किरात धर्मावलम्बीहरुले क्षेत्रमै धुपी, आँप, अम्बा लगायतका विरुवाहरु रोपेर धार्मिक गतिविधि पुनः सञ्चालनमा ल्याएका थिए ।

उक्त क्षेत्र (शिविरडाँडा चोक पश्चिम) मा विभिन्न धर्म र संस्कृति मान्ने समुदायका सांस्कृतिक स्थलहरू रहेका छन् तर किरात युमा माङहिममाथि पटक–पटक हुने हमलाप्रति स्थानीयवासीले चिन्ता व्यक्त गरेका छन् । घटनासम्बन्धमा बुझ्न खोज्दा सब डिभिजन वन कार्यालयका प्रमुख त्रिभुवन साहासँग सम्पर्क हुन सकेन ।