पथरी अपडेट
पथरी। पथरी शनिश्चरे नगरपालिकाको पशुपंक्षी तथा मत्स्य विकास शाखाको आयोजनामा वंगुरपालक कृषक र सरोकारवालाबीच अभिमुखीकरण कार्यक्रम सम्पन्न भएको छ ।

पथरी शनिश्चरे नगरपालिकाको सभाहलमा सम्पन्न उक्त कार्यक्रममा वंगुर पालनसम्बन्धी फाम व्यवस्थापन र जैविक सुरक्षाका विषयमा जानकारी दिइएकाे थियाे ।

कार्यक्रमका प्रमुख अतिथि नगरप्रमुख मोहन प्रसाद तुम्वापो, विशेष अतिथिका वडा नं. ७ का अध्यक्ष तथा आर्थिक विकास समिति संयोजक उद्धवराज बस्नेत शाखा प्राविधिक गणेशप्रसाद सिवाबोटी, पशु प्राविधिक लक्ष्मीकुमारी घिमिरे, कर्मचारी भेसप्रसाद घिमिरेलगायतको उपस्थिति रहेको थियो ।

कार्यक्रममा पशुपालन फामहरूलाई आवश्यक जैविक सुरक्षासम्बन्धी सामग्री हस्तान्तरण गरिएको थियो । साथै, उत्कृष्ट अभ्यास अपनाएका ६ वटा वंगुर फामलाई ‘पशुपालन असल अभ्यास अनुमतिपत्र’ प्रदान गरिएको छ । वडा नं. १०, विरेन्द्र टोलकाे अस्मी कृषि फाम, वडा नं. ९ काे असर्फि कृषि फाम, वडा नं. ६ काे मोती एकीकृत कृषि फाम, वडा नं. २ काे शान्ता वंगुर फाम, करूणा वंगुर कृषि फाम, दर्पण एग्रो फामलाई नगरप्रमुख मोहन प्रसाद तुम्वापोले प्रदान गर्नुभएको थियो ।

कार्यक्रममा बोल्दै नगरप्रमुख तुम्वापोले पशुपालन व्यवसायलाई व्यवस्थित र सुरक्षित बनाउँदै लैजान नगरपालिकाको तर्फबाट निरन्तर सहयोग रहने बताउनुभयो । उहाँले भन्नुभयो,
“पशुपालन व्यवसायलाई आत्मनिर्भर अर्थतन्त्रको आधार बनाउँदै लैजान यस्ता कार्यक्रमले महत्वपूर्ण भूमिका खेल्नेछन् । अनुमति पत्र प्राप्त कृषकहरूलाई बधाई र आगामी दिनमा अझ व्यवस्थित फाम सञ्चालन गर्न शुभकामना व्यक्त गर्दछु ।”