पथरी। रेडस्टार अंग्रेजी आवासीय मावि तथा ऋतम्भरा बहुमुखी क्याम्पसले कक्षा ११ र बीबीएस प्रथम वर्षका नयाँ विद्यार्थीहरूका लागि स्वागत तथा अभिमुखीकरण कार्यक्रम भव्य रूपमा सम्पन्न गरेको छ ।

शुक्रबार कोशी प्रदेश प्रमुख पर्शुराम खापुङको प्रमुख आतिथ्यमा सम्पन्न कार्यक्रममा विद्यालयका निर्देशक तथा प्रिन्सिपल टी.एन. तिम्सिनाले विद्यालयले स्थापना भएदेखि सात वर्षयता निरन्तर उत्कृष्ट शैक्षिक नतिजा दिँदै आएको जानकारी दिए । उनका अनुसार भर्खरै प्रकाशित राष्ट्रिय परीक्षा बोर्डको नतिजामा कक्षा १२ का चन्दन शाहले ३.९६ जीपीए ल्याएर विद्यालयको शैक्षिक गौरव थपेका छन् । शाहलाई सोही अवसरमा प्रदेश प्रमुख खापुङ र नेपाली चलचित्रका महानायक राजेश हमालले सम्मान गरे ।

महानायक हमालले रेडस्टार र ऋतम्भरा कलेजलाई एक अब्बल शैक्षिक केन्द्रका रूपमा उल्लेख गर्दै विद्यार्थीलाई उच्च शैक्षिक उपलब्धिको लागि शुभकामना दिए । उनले नयाँ भर्ना भएका विद्यार्थीलाई उत्प्रेरणात्मक अनुभव सुनाउँदै परिश्रम र अनुशासनलाई जीवनमा प्राथमिकता दिन आग्रह गरे । कार्यक्रममा विद्यार्थीहरूले गीत, संगीत र नृत्य प्रस्तुत गरी सबैलाई मनोरञ्जन दिलाएका थिए । सो क्रममा विद्यार्थीहरूले राजेश हमाललाई समेत स्टेजमै नचाएर वातावरण झनै रमाइलो बनाएका थिए ।

कार्यक्रममा पथरी शनिश्चरे नगरपालिकाकी उपप्रमुख देवी माया काफ्ले, मोरङका प्रमुख जिल्ला अधिकारी इन्द्रदेव यादव, नगरपालिकाका शिक्षा, युवा तथा खेलकुद शाखा प्रमुख नवीन खुलाल बुढाथोकी, वडा अध्यक्षहरू नैना राई, विजय लिम्बु, लोक किरण न्यौपाने, उद्धव बस्नेत, कृष्णबहादुर बस्नेत, उद्ववराज बस्नेत, ईलाका प्रहरी कार्यालय पथरीका डीएसपी तुलसीराम अर्याललगायतको उपस्थिति रहेको थियो ।