पथरी अपडेट
पथरी। पथरी शनिश्चरे नगरपालिका वडा नम्बर ४ का प्रकाश चौहान मिस्टर नेपाल २०२५ मा सहभागी जनाउने भएका छन् । उनलाई मंगलबार वडाध्यक्ष एवम् नगर प्रवक्ता नवीन कार्कीले औपचारिक रूपमा शुभकामना व्यक्त गर्नुभएको छ ।

वडाध्यक्ष कार्कीले आफ्नै कार्यकक्षमा आयोजित भेटघाट कार्यक्रममा चौहानलाई सम्मान गर्दै प्रतियोगितामा विजयी हुने शुभकामना दिनुभयो । उहाँले चौहानजस्तो क्षमतावान युवा प्रतिभा नगरकाे गौरव भएको उल्लेख गर्दै वडा नम्बर ८ तथा नगरपालिकाको तर्फबाट आवश्यक आर्थिक, भौतिक तथा प्राविधिक सहयोगका लागि पूर्ण प्रतिबद्धता जनाउनुभयो ।

“हाम्रो नगरका युवाले राष्ट्रिय स्तरमा आफ्नो प्रतिभा देखाउन लागेका छन्, यो हाम्रो गर्वको विषय हो,” वडाध्यक्ष कार्कीले भन्नुभयो, “वडा र नगरले उहाँलाई सम्भव भएसम्मको सहयोग गर्नेछ ।”

प्रकाश चौहान मिस्टर नेपाल २०२४ का टप ७ फाइनलिस्ट हुन् । साथै, उनी सो प्रतियोगिताको ‘मिस्टर एक्टिभ राउण्ड’ का विजेता समेत रहेका थिए । यसपटक उनले झन ठूलो लक्ष्यसहित मिस्टर नेपाल २०२५ मा प्रतिस्पर्धा गर्न लागेका हुन् ।

शुभकामना कार्यक्रमपछि संक्षिप्त प्रतिक्रिया दिँदै चौहानले वडा नम्बर ८ परिवारप्रति आभार प्रकट गरे । उनले भने, “मैले यो वर्ष धेरै मिहिनेत गरेको छु । एक वर्षको त्यो मिहिनेत म यसपटक देखाउने छु । आशा छ, तपाईंहरू सबैले साथ र समर्थन गर्नुहुनेछ ।”

प्रतियोगिता नजिकिँदै जाँदा चौहानले मोरङको प्रतिनिधित्व गर्दै आफ्नो सामर्थ्य र प्रतिभा प्रदर्शन गर्ने तयारीमा छन् ।