पथरी । मोरङको पथरी शनिश्चरेमा पहिलो पटक पञ्जा लडाई प्रतियोगिता सम्पन्न भएको छ । शनिबार वडा नं. ४ र ९ अवस्थित शनिश्चरे बजारमा द पावर जिम एण्ड फिटनेस क्लवको आयोजनामा ‘प्रथम पथरी शनिश्चरे पञ्जा लडाई प्रतियोगिता २०८२’ भव्य रुपमा सम्पन्न गरिएको हो ।

कार्यक्रम जिम हलका सञ्चालक लोक तामाङको सभापतित्वमा सम्पन्न भएको थियो । संयोजक विशाल बर्देवाले स्वागत मन्तव्य दिँदै प्रतियोगिताबारे विस्तृत जानकारी दिएका थिए । प्रमुख अतिथि संविधानसभा सदस्य लालबहादुर सुस्लिङ र वडा नं. ९ का वडाध्यक्ष वीरबहादुर राईबीचको पञ्जा लडाइँबाट प्रतियोगिताको औपचारिक उद्घाटन गरिएको थियो ।

उद्घाटन सत्रमा बोल्दै सुस्लिङले परम्परागत रूपमा मेलापातमा रमाइलोका लागि खेलिने पञ्जा लडाइँ पहिलो पटक प्रतियोगितात्मक रूपमा सुरु भएकोमा खुशी व्यक्त गरे । उनले नेपालमा यो खेल अझै खेल सङ्घ–संस्थाले औपचारिक मान्यता नदिए पनि युवाबीच लोकप्रिय हुँदै गएको बताए । त्यस्तै वडा नं. ७ का वडाध्यक्ष उद्धब बस्नेतले युवा पुस्तालाई दुव्र्यसनीबाट टाढा राख्न यस्ता गतिविधिले ठूलो योगदान गर्ने उल्लेख गर्दै परम्परागत खेललाई निरन्तरता दिन वडाबाट सहयोग गर्ने प्रतिवद्धता जनाए ।

सुमन कुरुङबाङले सञ्चालन गरेको कार्यक्रममा वडा नं. ३ का अध्यक्ष विजय लिम्बु, वडा नं. ४ का अध्यक्ष लोककिरण न्यौपाने, वडा नं. ८ का अध्यक्ष नविन कार्की, वडा नं. ९ का अध्यक्ष वीरबहादुर राई, समाजसेवी गंगा साँवा, भागिरथ मावि व्यवस्थापन समिति अध्यक्ष पर्शुराम कार्कीलगायतको उपस्थिति रहेको थियो ।

प्रतियोगितामा तीन तौल समूहका प्रतिस्पर्धीबीच प्रतिष्पर्धा गरिएको थियो । प्रतियोगितामा ०–५५ केजी समूह नारायण सुन्दास प्रथम, आर्यन श्रेष्ठ दोस्रो, उजन तामाङ तेस्रो भए । त्यस्तै ५५–६५ केजी समूहमा विश्वास थापा प्रथम, सुजन विश्वकर्मा दोस्रो, प्रवेश लिम्बु तेस्रो र ६५–७५ केजी समूह मौशम लिम्बु प्रथम, सुमन लिम्बु दोस्रो, शुक्र विश्वकर्मा तेस्रो घोषित भए । विजेताहरूले क्रमशः ५, ३ र २ हजार नगदसहित मेडल र प्रमाणपत्र प्राप्त गरेका थिए । 

पञ्जा लडाई अझै औपचारिक खेलको रूपमा स्थापित नभए पनि पछिल्लो समय विभिन्न जिल्लामा यसको आकर्षण बढ्दै गएको छ । काठमाडौं उपत्यकामा केही वर्षयता फिटनेस क्लबहरूले अन्तर–जिल्ला प्रतियोगिता आयोजना गर्दै आएका छन् । पोखरा, चितवन, धरान र इटहरीमा समेत यस खेलका प्रतिस्पर्धा हुँदै आएका छन् । तर राष्ट्रिय खेलकुद परिषद् (राखेप) अन्तर्गत भने अझै यो खेल दर्ता भइसकेको छैन ।