पथरी। पथरी शनिश्चरे नगरपालिकाका मेयर मोहन तुम्वापोले आफ्नो राजीनामाको विषयमा स्पष्टिकरण दिएका छन् । सामाजिक सञ्जालमार्फत धारणा सार्वजनिक गर्दै उनले जनप्रतिनिधिको पदप्रति आफूलाई लोभ मोह नभएको र कानुनी प्रक्रिया पूरा भएपछि तुरुन्तै पद त्याग गर्ने बताएका छन् ।

मेयर तुम्वापोले भने, “मेरो राजीनामा अहिले पनि नगरपालिकामा दर्ता भएको छ । संविधान र कानुनमा जे व्यवस्था छ, त्यही अनुसार मेरो राजीनामा स्वीकृत हुनेछ । नियम तथा प्रक्रिया अनुसार राजीनामा स्वीकृत भएपश्चात् म पदमा एक मिनेट पनि बस्दिन ।”

आफ्नो कार्यकालमा आफूले एक रुपैयाँ पनि घुस वा कमिशन नलिएको दाबी गर्दै उनले थपे, “मैले जीवनमा अहिलेसम्म बिना राजिखुसी कसैको एक रुपैयाँ लिएको वा खाएको छैन । पदमा रहँदा कसैलाई काखा-पाखा गरेको छैन, नैतिक पतन हुने कुनै अभद्र व्यवहार गरेको छैन । यदि प्रमाणसहित कसैलाई केही भन्नु छ भने म जवाफदेहीपूर्वक छलफल गर्न तयार छु ।”

उनले आफूलाई जनताले अनुमोदन गरेर जनप्रतिनिधि बनाएको उल्लेख गर्दै राजीनामाको विषय जनअभिमतसँग प्रत्यक्ष सरोकार राख्ने बताएका छन् । “मलाई जनताले मतदान गरेर प्रतिनिधि बनाएका हुन्, केवल केही व्यक्तिहरूले होइन । त्यसैले जनतालाई बेवास्ता गरेर वा निरपेक्ष भएर बस्नु व्यावहारिक हुँदैन,” उनले भने ।

मेयर तुम्वापोले अन्त्यमा जनप्रतिनिधिको पदप्रति कुनै लोभ मोह नभएको भन्दै छिनोफानो गर्ने शक्ति जनतामै हुने स्पष्ट पारेका छन् ।